நகரேஷு காஞ்சி

நகரேஷு காஞ்சி என்ற மூதுரைக்கு ஏற்றப்படி கடையும் கன்னியுமாக நல்ல ஷகராக இருக்கிறது இன்றைய காஞ்சிபுரம். இரண்டு சரவணபவன், ஒரு ஜாய் அலுக்காஸ் என்று ஜோரான சாப்பாடும் பளபள ஆபரணங்களாகவும் ஜொலிக்கிறது காஞ்சி. சைவம், வைஷ்ணவம், சாக்தம் என்று முப்பெரும் தெய்வ வழிபாடுகளால் ஊரெங்கும் பக்தி மணம் கமழுகிறது. ஆட்டோக்கள் பக்தர்கள் சுமக்கிறது. வண்டியை சற்றே அதிகமாக திருப்பினால் ஏதாவது ஒரு கோயில் மதில் சுவற்றில் போய் இடிக்கிறது. இந்திய நகரங்களின் தலைவிதிப்படி இங்கும் கூட்டம் பெருத்தால் வண்டி பெருக்கிறது. வண்டி பெருத்தால் ரோடு நிறைகிறது. வீதியெங்கும் வாகனங்கள் விரவியிருக்க சாலையெங்கும் ஒரே மக்கள் வெள்ளம். நாலடிக்கு ஒரு காக்கித் தொப்பை நின்று இல்லை இல்லை தொப்பி நின்று கொண்டு போக்குவரத்தை சீர் செய்கிறேன் பேர்வழி என்று சீர் குலைக்கிறது. ஈ காக்காய் வராத ரோடுக்கு பச்சை கொடுத்து விட்டு நாற்பது வண்டி நின்று அலைமோதும் திசையை ஒற்றைக்குச்சியை குறுக்கே காட்டி நிறுத்தி வைத்தார்கள். யாரோ வி.ஐ.பி நமது லைனில் க்ராஸ் செய்கிறார் போலிருக்கிறது என்று நினைத்து எட்டிப் பார்த்த சமயத்தில் கையில் திருவோடு ஏந்திய மகாகனம் பொருந்திய பிச்சைக்காரர் ஒருவர் ரோடு கிராஸ் செய்தார். போலீஸ்காரர் நீட்டிய குச்சியை மடக்கிய பின் சராசரி இந்தியர்களுக்கே உரித்தான 'சிக்னல் விட்டவுடன் குறுக்கே ஓடும்' மகோன்னதமான மனோநிலையில் இருந்த ஒரு இளவயது ஆன்டி பூமி அதிர வேகமாக ஓடி எதிர்க்கரை அடைந்தார். வண்டி எடுக்காமல் இதை வேடிக்கை பார்த்தவர்களும் ஆக்சிஜன் அதிகம் தேவைப்பட்ட அந்த ஓடிய ஆ.யும் ஒருசேர மேல்மூச்சு கீழ்மூச்சு வாங்கினர்.

காஞ்சிக்கு தொட்டடுத்த ஓரிக்கையில் மஹா பெரியவரின் மணி மண்டபம் கும்பாபிஷேகம் சென்ற வெள்ளிக்கிழமை வெகுவிமரிசையாக நடைபெற்றது. சங்கரா டி.வியில் சுத்தி சுத்தி லைவ் காண்பித்தார்கள். மணி மண்டபம் சென்று பெரியவரின் அருள் பெற்று வரலாம் என்ற எண்ணத்தில் ஞாயிறு மதியம் கிளம்பி காஞ்சியை ஒரு மூன்று மணி சுமாருக்கு அடைந்தபோது நான் கண்ட சீன் மேற்கண்ட பாராவில் விளக்கியாயிற்று. ஓரிக்கை காஞ்சி-உத்திரமேரூர் வழித்தடத்தில் ஐந்து கிலோ மீட்டர் தூரத்தில் இருக்கிறது. காஞ்சியை டிராபிக் வெள்ளத்தில் நீந்தி தாண்டிய பிறகு உத்திரமேரூர் நெடுஞ்சாலை என்று போர்டு போட்டிருந்த இடத்தில் இரண்டு சிறுவர்கள் ஒளிந்து போலீஸ் திருடன் விளையாடும் அளவிற்கு கட கடா குடு குடு நடுவிலே பள்ளம். மழை வந்தால் அந்தப் பக்கம் இருக்கும் நெற்பயிருக்கு பாசன நீர் கொடுக்கும் கன்மாயாக விளங்குகிறது. தட்டுத் தடுமாறி வண்டியை உருட்டிக்கொண்டு ஓரிக்கை என்ற பெயர்ப்பலகை அருகில் கைலியோடு சுவாரஸ்யமாக தம் அடித்துக் கொண்டிருந்த உள்ளூர்வாசி ஒருவரிடம் "மஹா பெரியவா..." என்று ஆரம்பிக்கும் முன்னரே "பஞ்சாயத் ஆபிஸ் பக்கம் ரைட்டுல போற ரோட்ல உள்ள போங்க.. " என்று சுருக்கமாக முடித்துக்கொண்டார்.

ஒரு குறுகிய சாலையில் நுழைந்து தெருவில் ஓடும் சிறுகுழந்தைகள், ஆடுகள், பாட்டிகள் மேலே வாகனத்தை ஏற்றாமல் ஒரு லெஃப்ட் ஒரு ரைட்டு ஒடித்தால் விசாலமான பெரிய இடத்தில் நடுவில் அழகாக மண்டபத்துடன் கோபுரம் தெரிகிறது. மன்னாதி மன்னர்களாலும் ராஜாதி ராஜாக்களினாலும் கட்டப்படும் கோயில்கள் "சுத்தா" (Suddha) என்ற வகைப்படும். அத்தகைய கோயில்களில் கட்டப்படும் பொருட்கள் பெரும்பாலும் கருங்கற்களை கொண்டு வேறு பொருட்கள் கலப்பு இல்லாமல் கட்டுவார்கள்.  கல், செங்கல், உலோகம் போன்ற பல பொருட்கள் கொண்டு எழுப்பப்படும் கோயில்கள் "மிஸ்ர விமானம்" என்றழைக்கப்படும். இந்த மணிமண்டபம் சுத்தா வகையை சார்ந்தது. முற்றிலும் வெண்ணிறமுள்ள பாறாங்கற்களை கொண்டு கட்டப்பட்டிருக்கிறது. காரை நிறுத்தியவுடன் வேஷ்டியை மடித்துக் கட்டிக்கொண்டு கக்கத்தில் ஒரு காஷ் பாக்கை இடுக்கிக்கொண்டு யாராவாது டோக்கென் போட வருவார்கள் என்று நினைத்து ஏமாந்து போனேன். ஏற்கனவே இருந்த மஹா பெரியவா சரணம் போட்ட ஒரு காரும், ஒரு வேனும் சில ஜனகளை இறக்கி விட்டுவிட்டு நின்றுருந்தது.

பளீர் என்று கண்ணைப் பறிக்கும் நீலக் கலர் உடையில் இருந்த செக்யுரிட்டி "மூனரை மணிக்கு தொறப்பாங்க" என்று எல்லோரிடமும் சொல்லிக்கொண்டிருந்தார். நானும் ஒரு முறை அவரைக் கேட்டு தொந்தரவு செய்யாமல் ஆளைத் தூக்கும் காற்று அடிக்கும் அந்த மண்டபத்தில் அமர்ந்தேன். பசங்கள் ஓடி விளையாண்டது. கல்லை இழைத்து கட்டியிருக்கிறார்கள். ஒரு பெரிய கல்லில் நந்தியை அடிக்க ஆரம்பித்து முடிக்காமல் விட்டிருக்கிறார்கள். நல்ல தேஜஸுடன் அமைந்த நிறைய சிற்பங்கள் வடித்திருக்கிறார்கள். காலை நீட்டி விஸ்ராந்தியாக உட்கார்ந்ததில் நித்ரா தேவி உடனே வந்து என்னை ஆரத்தழுவிக் கொண்டாள். திருக்கோயில் மண்டபங்களில் அன்னதானத் திட்டத்தில் சாப்பிட்டுவிட்டு நிறைய பேர் இன்ஸ்டன்ட்டாக ஒரு தூக்கம் போட்டு ரெஸ்ட் எடுக்கும் மகத்துவம் விளங்கிற்று.

பாதி தூக்கத்தில் திடீரென்று ஒரே கசமுசாவென்று சத்தம். பள்ளிகொண்ட பெருமாள் போஸில் அசையாமல் அப்படியே அரைக்கண் திறந்து பார்த்ததில் இரண்டு மஹிந்திரா வேன் திணற திணற ஐம்பது மடிசார் மாமிகளை கொண்டு வந்து இறக்கியது. ஜெட் ஏர்வேஸ், கிங்பிஷர் விமான பணிப்பெண்கள் யூனிஃபார்ம் அணிவது போல அரக்கு பார்டர் வைத்த நீலக் கலர் ஒன்பது கஜம் பட்டுப் புடவைக்கு  மேட்சிங்காக அரக்கு நிற சோளியில் வேன் குலுங்க இறங்கினார்கள். உடனே வாரி சுருட்டி எழுந்துவிட்டேன். தங்க்ஸ் ஒரு பார்வையில் என்னைப் புரிந்துகொண்டார்கள்.(?!). திறக்கபடாத சன்னதி முன்னர் எல்லோரும் ஆஜரானார்கள். வாட்டசாட்டமாய் இருந்த தலைமை மாமி "ம்.. உக்காந்து ஆரம்பிங்கோ..." என்று ஆஞகை பிறப்பிக்க சன்னதிக்கு வழிவிட்டு இரு புறமும் இரு அணிகளாக உட்கார்ந்தார்கள். அவர்கள் காவலுக்கு ரெண்டு மாமா இரண்டு பக்க கடைக்கோடி ஓரத்திலும் "ஈஸ்வரா" என்று சொல்லி மேல் துண்டால் தரையை தட்டி அமர்ந்துகொண்டார்கள். "சிந்தூராருண விக்ரஹா.." என்று பாம்பே சிஸ்டேர்ஸ் கணக்காக லலிதா சஹஸ்ரநாமம் பாராயணம் பண்ண ஆரம்பித்துவிட்டார்கள். அடடா.. தூங்கி வழிந்துகொண்டிருந்த மணி மண்டபம் களை கட்ட ஆரம்பித்துவிட்டது. மூனரைக்கு சன்னதி திறந்தவுடன் எப்போதும் நம்மூர் கோயில்களில் ஏற்படுவது போல தள்ளுமுள்ளு ஏற்பட்டது. மக்களுடன் ஜோதியில் ஐக்கியமாகி மஹா பெரியவாளை  தரிசித்தேன். அற்புதமான ஐந்தடி மூர்த்தம். அமர்ந்த திருமேனி. நேரே உட்கார்ந்து பேசுவது போல் இருந்தது. பக்கத்தில் "நா இருக்கேன்" என்று எழுதி மஹா பெரியவரின் ஆளுயர படம் ஒன்று வைத்திருந்தார்கள். அதில் நெஞ்சில் வலது கையை வைத்து உட்கார்ந்திருந்தார் பெரியவா. காண கண்ணாயிரம் வேண்டும். திவ்யமாக இருந்தது.

தரிசனம் முடித்துக்கொண்டு வரும் வழியில் காமாக்ஷியம்மனை தரிசித்தோம். இரட்டை யானை கோயில் வாசலில் வரவேற்றது. ஒரு ரூபாயை தும்பிக்கையை நீட்டி வாங்கிக் கொண்டு என் குழந்தைகளுக்கு ஆசீர்வாதம் செய்தது. பாலபிஷேகம் பார்த்தோம். மக்கள் எல்லோரும் இரண்டறக் கலந்து அம்மனை தரிசித்தார்கள். கும்பலாக திட்டிக்கொண்டும் அடித்துக்கொண்டும் மிதித்துக்கொண்டும் சாமி கும்பிட்டார்கள். உள்ளே அர்ச்சகரின் அர்ச்சனையும் வெளியே பக்தர்களின் அர்ச்சனையையும் காது ஒரு சேர வாங்கிக் கொண்டது. ப்ரதக்ஷிணம் செய்யமுடியாமல் வந்தவழியே திரும்பி வந்து துவஜஸ்தம்பம் அருகில் நமஸ்கரித்து அம்பாளிடம் இருந்து விடைபெற்றோம்.

திரும்பி வரும்வழியில் பெரியவள் அடுத்த வாரம் காஞ்சீபுரம் ஒன்ஸ் மோர் போலாமா டாடி என்று கேட்டாள்.

படங்கள்: அடியேன் எடுத்தது மற்றும் kamakoti.org, indiadivine.org என்ற  தளங்களிலிருந்து...

-