செவிக்கின்பம்

இதை விட சிறந்த பேர் இந்த பதிவுக்கு சூட்ட முடியாது. பொதுவாகவே மலையாள பாடல்களில் கர்நாடிக் கொஞ்சம் தூக்கலாக இருக்கும். என்னுடைய சீதா கல்யாண வைபோகமே பதிவு எழுதும் போதே இதைத் தேடினேன். கிடைக்கவில்லை. படத்தின் பெயர் எண்டே மோகங்கள் பூவினிங்கு. கர்நாடக சங்கீதம் தெரிந்தாலும், இல்லாவிட்டாலும் இதை கேட்கலாம். அத்தனை அருமை. இயற்க்கை கொஞ்சும் மலையாள தேசத்தில் திண்ணையில் உட்கார்ந்து பக்க வாத்தியங்களோடு நடிகர்கள் மூலமாக மேலே குறிப்பிட்ட படத்தில் பால முரளி கிருஷ்ணா, கே.ஜே. யேசுதாஸ் மற்றும் ஜானகி பாடியது. கேட்க கேட்க செவிக்கின்பம்.

ரகுவர...

1:24 மணித்துளிகளில் இருந்து ஜேசு பாட ஆரம்பித்து அப்புறம் இறுதியில் ஜானகியும் சேர்ந்துகொள்வார். முதலில் ஜேசுவும், பாலமுரளியும் போட்டி போட்டுக்கொண்டு மாறி மாறி பாடி நம் காதுகளை சங்கீத தேன் கொண்டு குளிப்பாட்டுகிறார்கள். பின்னால் ஜானகி அவர் பங்குக்கு வந்து ரகளை செய்வார். ரொம்ப நாள் கழித்து கேட்டதால், இதுவரை பத்து முறை கேட்டாகிவிட்டது. இன்னமும் அலுக்கவில்லை.

மனசுலோனி..... யேசுதாஸ், ஜானகி.  பாடல் முழுவதும் தண்ணீருக்குள் நின்று சாதகம் செய்யும் காட்சி.  சாதகம் முடியும் போது இருவரும் கண்ணோடு கண் கலந்து காதல் மலரும் காட்சி. அசாத்ய சாதகம்.

3:40  நிமிடத்தில்.. யேசுதாஸ் சிரித்துவிட்டு பாட ஆரம்பிக்கும் கட்டம் சூப்பர்.



ரசிக்கும்படியாக இருந்ததா உங்களுக்கு?