உரச... உரச...

மெயின் ரோடுக்கு வந்ததிலிருந்தே அந்த அன்பர் பின்னால் உறுமிக்கொண்டே வந்தார். இடதும் வலதுமாய் அவரது வண்டி அலைபாய்ந்தது. பில்லியனில் பல்லி போல முதுகோடு ஓட்டிக்கொண்டு ஒரு பச்சை சட்டை இளம் பெண் வேறு. ஆளும் வெடவெட வென்று பல்லி போலத்தான் இருந்தது. அவர் நடு ரோடில் பிரேக் டான்ஸ் அடித்து ஒட்டும் போது அந்த வாலிபரின் முதுக்கு மேலே அரை அடி போய் போய் திரும்பவும் பின் சீட்டில் லேன்ட் ஆனாள் அந்தப் பெண். கருப்பு ஹெல்மெட் போட்டு அதில் பின்பக்கம் மண்டை ஓடு போட்டிருந்தார். கோஸ்ட் ரைடர். அரை மணி அந்த வண்டியில் போனால் இடுப்பு இந்தப் பக்கம் கழண்டு வந்து விழுந்துவிடும் போலிருந்தது. வேகமாக போவது மட்டுமன்றி ஒரே பேய் ஆட்டம் வேறு நடுரோட்டில். 

ஃபளைஓவர் ஏறி இறங்கியதும் ஒரு சிக்னல். சற்று நேரம் ஆட்டத்திற்கு ஒய்வு கிடைத்தது அந்த அன்பருக்கும் அப்பெண்ணிர்க்கும். கொஞ்சம் ரெஸ்ட் எடுத்துக்கொண்டார்கள். அவரை விட மெதுவாக வந்த நானும் இப்போது அதே சிக்னலில். பக்கத்தில் வீட்டம்மணி இருந்தாலும் ஒரு தைரியத்தை வரவழைத்துக்கொண்டு மெதுவாக அந்தப் பெண்ணை எட்டிப் பார்த்தேன். ஒரு கருப்பு துணியால் முகத்தை முழுக்க மறைத்து ஒரு தீவிரவாதி போல இருந்தாள். முழுக்க நனைந்தப்புறம் முக்காடு எதற்கு? நன்றாக இப்படியும் அப்படியும் அசைந்து உட்கார்ந்து ஒரு இம்மியளவு கூட இருவருக்கும் இடையில் இடம் இல்லாமல் பார்த்துக்கொண்டாள். ஒரு காற்றுப்புகா தடுப்பை உருவாக்கினாள். அடுத்த கட்ட ஆட்டலுக்கு தயாரானாள். சிக்னல் விட்டவுடன் மறுபடியும் வண்டி சீறியது. வலது கோடிக்கும் இடது கோடிக்கும் ரோடை அளந்தது. ஒரு ஆட்டோக்காரர், ஒரு எல் போர்டு ஸ்கூட்டி, ஒரு தண்ணீர் வான் மூன்றையும் ஒருமுறை கை அழுந்த கால் அழுந்த முழு பிரேக் அழுத்த வைத்தார் நம்ம மரணக் கிணறு ஹீரோ.

மீண்டும் சிக்னல். நாமும் மீண்டும் எட்டிப் பிடித்தோம். அந்தப்புறமும் இந்தப்புறமும் ஒரு ரோபோ போல ஹெல்மெட் திரும்பியது. பின்னால் பச்சை சட்டை தேமேன்னு "பச்சக்கென்று" ஓட்டிக்கொண்டு உட்கார்ந்திருந்தது. இவ்விருவரையும் ஃபெவிகால் விளம்பரம் எடுப்போர் பார்த்தால் நிச்சயம் உபயோகித்துக் கொள்வார்கள். சற்று முன் பிரேக் அடித்த ஆட்டோக்காரர் பக்கத்தில் சென்று சென்னை பாணியில் கையை தூக்கி ஏதோ சொன்னார். எதையுமே சட்டை செய்யாமல் "டர்..டர்.." என்ற சத்தத்துடன் ஆக்ஸிலேட்டரை திருகி மீண்டும் முன் வீல் தூக்கி கிளப்பி பயணிக்க ஆரம்பித்தது. இன்னமும் சிக்னல் ரெட் காட்டிக்கொண்டிருந்தது. அடுத்த சில நொடிகளில் எல்லோருக்கும் பச்சை காட்டியது சிக்னல். துரத்தாமல் மிதமான வேகத்தில் வண்டி ஓட்டி போய் பிடித்தால் அடுத்த சிக்னலில் பாயக் காத்திருக்கும் கருப்பு புலி போல "டர்...டர்..." என்று உறுமி நின்றுகொண்டிருந்தது அந்த பல்சர். 

மீண்டும் மீண்டும் சிக்னல் ரேஸ் சிக்னல் ரேஸ் என்று தட்டி விளையாடிக்கொண்டிருந்தது அந்த பல்சர். அரை இன்ச் ஒரு இன்ச் இடைவெளியில் எல்லா வண்டியையும் முத்தம் கொடுக்கலாமா வேண்டாமா என்று உரசி உரசி ஓட்டிக்கொண்டு போன அந்த பந்தய அன்பர் கண்டதெல்லாம் ஒன்றுமில்லை. எப்படி ஓட்டினாலும் நாற்பதில் நாலு சக்கரத்தில் பின்னால் வந்த நானும் ஒவ்வொரு சிக்னலில் அவரோடு காத்திருக்க நேரிட்டது. இப்படி பைக்கோமேனியா பித்து பிடித்து சீன் போட்டு வண்டி ஓட்டும் ரகஸியம் யாருக்காவது தெரிந்தால் சொல்லுங்களேன். ஒருக்கால் பில்லியனில் பயணித்த அந்த பல்லிக்கு தெரிந்திருக்குமோ? யார் கண்டார்?

பின் குறிப்புப் பாடல்: இதுக்கெல்லாம் இவர் காரணமா இருக்குமோ? இல்லை ஒட்ரவங்களுக்கு இவர்ன்னு நினைப்பா?

இவங்களுக்கு எதிர் பாடல்: 
வத்திக்குச்சி பத்திக்காதுடா யாரும் வந்து உரசர வரையில... அப்படின்னு தல மாதிரி இந்த ஆளுங்களைப் பார்த்து பாட வேண்டியதுதான். ஆனா பாடகர்களின் 'தல' நம்ம எஸ்.பி.பி சும்மா பூந்து விளையாடியிருக்கும் இந்தப் பாட்டுல.. போதாததுக்கு தல கூட நடுப்பர தள தளன்னு நக்மா வேற கிளு கிளுன்னு ...




ஏம்பா... "உரச... உரச..." உன் கூட யாராவது வண்டி ஒட்டிக்கிட்டு வந்தா ஒரு பதிவு போடுவியா.. சே சுத்த மோசம். (அப்பா.. டைட்டில் வந்திருச்சு..முடிச்சுப்போம்)

பட உதவி: philip9876.com
--