தொலைநோக்குப் பார்வை

லிகோத்பவனான சிவனாரின் அடிமுடி காண ப்ரம்மா அன்னப்பறவையாகவும் விஷ்ணு பன்றி வடிவத்திலும் உருமாறி புறப்பட்டார்களாம். படாதபாடுபட்டும் இருவருக்கும் வெற்றி கிட்டவில்லை.  அடிமுடி காண முடியவில்லை. ஆனால் இந்த கிராபிக்ஸ் யுகத்தில் ப்ரம்சும் விஷியும் அனிமேஷன் கொண்டு சிவனின் அடிமுடித் தரிசனம் பெற்றுவிடலாம். சில நாட்களுக்கு முன் பூமியை அனிமேஷனில் நிறுத்திப் பார்த்து என்னவெல்லாம் நிகழும் என்று வெளிநாட்டவர் ஒருவர் மல்லாக்க படுத்து ஆராய்ச்சி பண்ணிய கட்டுரை ஒன்றை வெளியிட்டிருந்தேன். அதுபோல இதுவும் கொஞ்சம் சயின்ஸ். இப்ப விஷயம் என்னான்னா பூமியிலேர்ந்து பத்தின் மடங்காக மேலே மேலே மேலே போய்கிட்டே இருந்தா என்ன வரும். என்ன தெரியும். இரண்டு பத்தின் மடங்கா வீட்டு மொட்டை மாடி மேலே ஏறி நின்னா பக்கத்து வீட்டு பாத்ரூம் தெரியும் அப்படிங்கற லெவெல்ல நாம யோசிச்சாலும் சில சிந்தனாசிற்பிகள் மொட்டை மாடிக்கு மேலே யோசிக்கிறார்கள்.

நிறைய இடங்கள்ள நாம கொசுவத்தி சுத்திதான் பார்த்திருக்கோம். இங்க கட்டம் கட்டமா கட்டம் கட்டி அடுத்ததடுத்த கட்டத்திற்கு மேல கொண்டு போகிறார்கள். சிகாகோல ரெஸ்ட்டுக்கு வானத்தை பார்த்து படுத்திருக்கும் ஒருவரை காண்பித்து ஒவ்வொரு பத்து செகண்டிர்க்கும் மேன் மேலே போய் நம்முடைய அண்ட பகிரண்டம் எல்லாம் தாண்டி, பால் வீதி தாண்டி, மோர் வீதி இன்னும் மோர் போய்.. போய்... போய்க்கொண்டே இருக்கிறார்கள். கடைசியாக துக்குணூண்டு பென் டார்ச் வெளிச்ச புள்ளியாய் நம்ம நட்சத்திர மண்டலம் தெரியுது. இந்திரன், நாரதர் மற்றும் இதர தேவாதி தேவர்கள் தெரியலை.  முடிந்தால் அதையும் காண்பித்திருக்கலாம். போற வழிக்கு புண்ணியம். அதுக்கு மேலே போக வேண்டாம்ன்னு முடிவு பண்ணி ரோலர் கோஸ்டேர்ல அடிவயிறு கலகலக்க சரேல்ன்னு இறங்கறா மாதிரி நேரே கீழ பூமிக்கு கொண்டு வந்து படுத்துக்கொண்டிருந்த மனுஷனின் கைக்குள்ள படம் புடிச்சு காட்றாங்க. அங்கேயும் குடைஞ்சு குடைஞ்சு உள்ள போய் வெள்ளை ரத்த அணுக்கள் உள்ளே இருக்கும் டி.என்.ஏவை அடைந்து அதற்குள் இருக்கும் கார்பன் மூலத்தில் குடிகொண்டுள்ள ப்ரோடான் வரைக்கும் செல்கிறார்கள். உங்கள் ஆயாவிற்கும் ஐஸுக்கும் இது ஒரே மாதிரி தான் இருக்குமாம்.

இவ்ளோ தூரம் காமிச்சவங்க அப்படியே "காதல் அணுக்கள் உடம்பில் எத்தனை" அப்படின்னு எந்திரன்ல சூப்பர் ஸ்டார் கேட்ட கேள்விக்கு பதில் சொல்லியிருக்கலாம்ல.

-
-